Две мачки најверојатно предизвикале пожар во стан во германската покраина Баварија, откако додека биле сами во домот случајно ги активирале ринглите на шпоретот.

Инцидентот се случил во Велден, во округот Ландсхут, во Долна Баварија. Според полицијата, животните при игра најверојатно ги свртеле копчињата на две рингли. На една од нив имало оставено пластично шише, кое се запалило, по што огнот се проширил низ станот.

Чадот бил забележан од сведоци, кои веднаш ја алармирале противпожарната служба. Пожарникарите успеале да го изгаснат огнот и да го проветрат објектот, а според локалните информации, жителите не биле повредени.

Една од мачките била спасена од станот и ѝ била укажана помош, додека другата не го преживеала пожарот. Интервенцијата траела до околу 11 часот, а материјалната штета полицијата ја проценува на околу 100.000 евра.

Случајот уште еднаш го отвори прашањето за безбедноста во домовите со миленици, особено кога на шпорет или во близина на уреди што можат лесно да се активираат се оставаат запаливи предмети.