Регионални аналитичари сметаат дека најавата на САД дека на Косово ќе испратат дополнителни 130 војници како поддршка на КФОР и НАТО е порака до „военохушкачките“ политичари во регионот. 

Станува збор за припадници на американските специјални единици од првиот батаљон со седиште во Тупело. Тие се високо обучени за итни интервенции и на Косово ќе стигнат по подготовките во базата Форт Худ во Тексас.

Во оваа база специјалците отпатувале за време на викендот, а на подготовките наводно ќе учат албански и српски јазик и ќе се запознаваат со Балканот. Кога ќе пристигнат на Косово ќе бидат распоредени во рамки на силите на КФОР во единица која користи хеликоптери УХ 60 „блекхок“ и таму треба да останат 10 месеци.

Српскиот аналитичар Душан Јањиќ истакнува дека тоа е политичко безбедносна порака на САД, а не војна.

„На овој начин Американците јасно им ставаат до знаење на локалните политичари да не си играат повеќе војна и дека повторно оперативно се враќаат на Балканот. Нивната проценка е дека регионот премногу им го препуштиле на Турците, на НАТО и на Европејците. Сметаат и дека Балканот е во опасност од тероризам“- вели Јањиќ.

Професорот на белградскиот Факултет за безбедност,  Зоран Драгшиќ е со став дека дополнителните американски трупи се неопходно поради засилените тензии на Балканот.

Драгшиќ смета дека засиленото присуство на САД е јасна порака дека нема ништо од формирање на војска на Косово.