Бакарот е на пат кон најголемото годишно зголемување на цената за повеќе од една деценија, првенствено поради прекините во снабдувањето, слабеењето на американскиот долар, очекуваниот раст на кинеската економија и големите трошоци за вештачка интелигенција, објави CNBC.

Аналитичарите забележуваат дека растот на црвениот метал би можел да продолжи следната година, особено поради стравувањата од понудата и брзата експанзија на развојот на глобалните центри за податоци.

Тромесечните цени на бакарот на Лондонската берза за метали (LME) денеска се зголемија за 1,5 проценти, на 12.405 долари за тон, по рекордно високото ниво од 12.960 долари во претходната сесија.

Вредноста на црвениот метал скокна за околу 41 процент во 2025 година и е на пат кон најдобрата година од 2009 година, кога доби повеќе од 140 проценти откако земјите излегоа од глобалната финансиска криза.

Побарувачката за бакар се смета за индикатор за економско закрепнување, бидејќи овој метал е од клучно значење за екосистемот на енергетска транзиција и е составен дел од производството на електрични возила, електрични мрежи и ветерни турбини.