Прегледот на тргувањето во Q1 2020 година на Македонска берза покажува значајно зголемен промет од тргување со акции во Q1 2020 година. 

Изразени ценовни флуктуации и пад на вредноста на МБИ10 и промени на дневните ценовни ограничувања и воведување на нов механизам за автоматско стабилизирање на ценовните движења. 

„Вкупниот промет по сите основи во Q1 2020 година изнесуваше околу 68 милиони евра, што преставува зголемување од 133% наспроти Q1 2019 година (29 милиони евра), односно зголемување од 97% во однос на Q4 2019 година (34 милиони евра). Прометот со акции во БЕСТ системот во овој квартал бележи вредност од околу 41,7 милиони евра и е за 231% поголем во однос на истата големина во Q1 2019 година, односно 122% повеќе споредено со Q4 2019 година. Анализата на десетгодишната временска серија на дневниот промет од тргување со акции во БЕСТ системот покажува дека во последните 10 години дури 5 дена со најголем промет од тргување со акции во класичното тргување биле токму во март 2020 година (12.03.2020 - околу 2,2 милиони евра, 06.03.2020 - околу 2 милиони евра, 20.03 - близу 2 милиони евра, 18.03 и 13.03.2020 година - околу 1,9 милиони евра и 1,8 милиони евра респективно)“, објавено е на Македонска Берза. 

Македонскиот берзански индекс - МБИ10 во првиот квартал од 2020 година бележи пад од околу 22%. 

Доколку се анализира по месеци, после одличната перформанса на индексот во јануари (+5,8%), негативните перцепции за последиците од состојбите поврзани со COVID-19 и движењата на меѓународните пазари во текот на февруари го поништија претходниот раст на МБИ10 (-5%), а само во месец март индексот забележа пад од 22,47%, што преставува втор најголем месечен пад на вредноста на МБИ10 од неговото воведување во јануари 2005 година (поголем месечен пад е регистриран само во октомври 2008 година). 

Со оглед на ваквите ценовни движења вкупната пазарна капитализација на котираните акционерски друштва на крајот на март 2020 година изнесуваше околу 2,5 милијарди евра и во однос на крајот на 2019 година бележи пад од околу 16%.