За една третина се зголемен бројот на самоубиства во Грција, по воведувањето на мерките на штедење во 2011 година, се наведува во студиата што е објавена денеска. Студијата ја подготвиле американски и грчки научници, кои направиле истражување на бројот на самоубиства во периодот од 1983 до 2012 година кои се поврзани со економската ситуација и мерките за штедење во државата. „Нашата анализа покажа значителен пораст на самоубиствата како резултат на случувањата поврзани со штедењето во Грција“, навеле експертите во студијата што е објавена во медицинското списание БМЏ Опен. Бројот на самоубиства се зголемил за 35,7 % од јуни 2011 година кога тогашната влада во Грција најави строги мерки на штедење.