Чешкиот претседател Милош Земан жали што во моментов нема организирани туристички посети на чешки гости во нашата држава, затоа што тој е одушевен од убавините на Охрид и Македонија.

„Македонија е прекрасна земја, а доколку се има предвид дека туризмот е индустрија, тука постои празнина што треба да се пополни“ - рече тој.

Добрите пријателски односи меѓу Македонија и Чешка треба да ги следат и бизнис-заедниците на двете држави, изјави денеска на Македонско-чешкиот бизнис форум што се одржува во Охрид претседателот на Македонија, Ѓорѓе Иванов.

Значајна за двете земји е соработката во енергетскиот сектор, рударството, обновливите ресурси, развојот на малите хидроцентрали, ветерните електрани, сончевата енергија и геотермалните технологии.

„Посебен интерес постои и во областа на металната и електроиндустријата, во автомобилската индустрија за поврзување на македонските производители со чешки компании, хемиската индустрија, животната средина, земјоделството, прехрамбената индустрија и туризмот“ - вели Иванов.

Земан зборуваше и за недоволно искористените можности за чешки инвестиции во Македонија. Смета дека тоа е пропуст на двете држави и наведе примери на административни и бирократски пречки.

Иванов на Земан вчера му го врачи највисокото државно одликување  на Република Македонија, Орденот „8 септември“, како израз на благодарност до него лично, но и и до чешкиот народ  и држава, и до сите претходни чешки лидери за сета досегашна поддршка и помош.