Пред неполн месец страшна сообраќајна несреќа го потресе главниот град во која жртва беше новинарката Сузана Тодоровска Павловска.

Таа го загуби животот во 50-тата година од својот живот, кога кај Трговскиот центар „Зебра“ во неа удри автомобил  „Опел корса“ со скопски регистерски таблици кога возачот изгубил контрола и со голема брзина удрил во неа.

Основното јавно обвинителство – Скопје денеска информираше декаистрагата за овој случај е завршена и за истиот е поднесен обвинителен акт против едно лице за кривично дело – Тешки дела против безбедноста на луѓето и имотот во сообраќајот од чл. 300 ст. 2 вв чл.297 ст. 1 од Кривичниот законик.

Во соопштението на Обвинителството стои дека, обвинетиот бил под дејство на алкохол  (1,52 промили во крвта и 2,42 промили во урина) и наркотични средства-канабис, а возилото го управувал со со брзина од 83 км/час при што загубил контрола и удрил во сега починатата.

Покрај,  обвинителниот акт, кон него е ставен и посебен предлог за да биде продолжена мерката - притвор.

Да се потсетиме ...

Вечерта на 7 јули новинарката во Македонското радио  Сузана Тодоровска Павловска го загуби животот кога возачот на автомобил „Опел корса“ со скопски регистерски таблици изгубил контрола и со голема брзина удрил во неа.

Незгодата се случи околу 20 часот на улица Васил Ѓоргов во близина на трговскиот центар „Зебра“, а автомобилот потоа влетал во еден од излозите на околните згради, додека жената починала на лице место и безуспешни биле обидите да и се пружи помош.

Возилото било управувано од страна на 37-годишниот Б.Б од Скопје, а имало и сопатнича. И двајцата беа со телесни повреди.

Се поголем е бројот на ваквите незгоди на скопските улици. Станаа секојдневие пред очите на граѓаните. Апел до возачите да обратат поголемо внимание на брзината со која го управуваат возилото.