На владина седница синоќа беше усвоена информацијата за потреба од итна санација на армирано-бетонски мост на пругата Велес - Гевгелија, но познавачите на ситуацијата во Македонски железници - Инфраструктура велат дека тоа е само краткорочно решение за проблемот поради кои возовите одат само од Скопје до Велес и назад.

- Знам само дека екипи веќе работат на терен, може да се санира за 15-тина дена, но тоа не е решение. Потребен е сосема нов мост, бидејќи на овој што е сега, инаку во должина од 30 метри, и кога ќе биде пуштен повторно во употреба ќе мора да се внимава и да се управува локомотивата со пет километри на час - вели анонимен познавач на состојбите со инфраструктурата на МЖ.

Македонски железници Транспорт АД ги информира патниците дека од 2 октомври поради појавени деформации на бетонскиот мост кој се наоѓа помеѓу станица Градско и крстосница Кукуричани, патниот правец Велес – Гевгелија е прекинат за сообраќај. Прекинот ќе трае до завршување на санацијата на дефектот. Во меѓувреме, возовите кои сообраќаа на релација Скопје-Гевгелија и Гевгелија-Скопје, ќе сообраќаат само до Велес и обратно.

- Се работи за напукнување и на попуштање на бетонските столбови долу на површината. Голема среќа е што машиновозачот кој последен минувал бил присебен, а потоа по службена должност го пријавил проблемот. Можам да кажам дека овој мост е воопшто неодржлив, бидејќи порано околу него имало челична конструкција како негова сигурност но со текот на времето е крадена и ништо не е останато од неа без никој да сноси одговорност за тоа - додава познавачот.

Министерствата за финансии и за транспорт и врски се задолжени да предложат можни решенија за изнаоѓање финансиски средства потребни за санацијата на мостот. Додека ЈП Македонски железници - Инфраструктура е задолжено да започне итна постапката за реализација на набавката - санација на армирано - бетонскиот мост на пругата Велес - Гевгелија.

Во Македонски железници - Инфраструктура во планот за јавни набакви за 2018 веќе стои ставка за санација на мост кај Мрзенска река во вредност од 6 милиони денари.

Александар Кузмановски