На станарите на Бурј Калифа, највисоката зграда на светот, можат да им бидат исклучени клима уредите, па дури и лифтот заради неплатени сметки за заедничко домување, објави Си-Ен-Ен. Зградата во Дубаи е висока 160 ката, а исклучувањето на лифотвите ќе го направи животот во неа невозможен. „Ги повикувам сите станари да си ги платат трошоците за услугите за да се обезбеди беспрекорно управување со заедничките простории и другите содржини“, изјави портпаролот на Емаар Пропертис, компанијата задолжена за одржување на зградата. Од фирмата неколкупати ги предупредувале неодговорните станари, ама без успех. Некои станари не платиле сметки од 2012 година! Затоа компанијата морала да испрати писмо со кое им објаснува дека ќе биде принудена да им ги блокира картичките за влез во гаражите, фитнес центрите, базените и тениските терени во зградата. „Сопствениците кои си ги подмириле обврските и натаму ќе можат да пристапат до сите содржини“, појаснуваат од Емаар. Според податоците на Агенциите за недвижности во Дубаи, во највисоката зграда на светот има 900 луксузни апартмани. Апартманите со една соба се изнајмуваат за 55.000 долари годишно, а таа сума мора да се плати однапред. Трошоците за одржување изнесуваат 25.000 долари годишно.