Триесетгодишен Италијанец  решил да направи потег што на многумина им изгледа незамислив, напуштајќи ја добро платената работа во Тесла и враќајќи се дома за да одгледува печурки во самиот центар на Милано, пишува Ил Пјаченца.

Пјетро Тревисан, роден во Пјаченца, дипломирал на универзитет во Соединетите Американски Држави, по што се вработил во една од најпознатите технолошки компании во светот.

Но, наместо да ја продолжи кариерата во Силиконската долина, тој решил да престане со сè и да се врати во Италија, каде што почнал да се занимава со земјоделство.

Денес, на само три километри од Миланската катедрала, Тревисан ја води урбаната фарма „Буоно Фарм“.

Во поранешен канцелариски простор во населбата Маѓолина, тој организирал технолошки опремена микрофарма со четири климатски комори, каде што тој и неговиот тим произведуваат околу 250 килограми печурки неделно.

Месечно, ова изнесува приближно еден тон печурки кои тој лично ги доставува до ресторани и маркети, користејќи електричен товарен велосипед. Ја започнал својата кариера во Тесла. Патот до ова бил сè друго освен обичен.

Откако ја завршил програмата за двојна диплома во САД, ја започнал својата кариера во Тесла, каде, како што наведува, веќе заработувал околу 8.000 долари (6.845 евра) месечно на 20-годишна возраст, пренесува bizportal.rs.

Работел во логистиката на возила наменети за европскиот пазар, по што следеле позиции во голема американска непрофитна организација, во HP во Прага и двегодишен ангажман во софтверска компанија во Даблин. Иако има добра плата, а со текот на времето можел да има и подобра, секогаш му недостасувало нешто.

„Се забавував одлично во Даблин, но сфатив дека сакам нешто свое. Уште од детството сонував да се занимавам со земјоделство. Не на село, туку на модерен начин, во градот, со технологија“, вели Тревисан.

Неговата фарма се базира на кружен модел на производство. Тој одгледува печурки на рециклирани супстрати, користејќи мелено кафе и отпадни материјали од пиварницата, што истовремено го намалува отпадот и ја зголемува одржливоста на производството. Концептот е јасен: производство во градот, продажба во радиус од пет километри, без долги транспортни патишта и дополнителни емисии.

foto freepik.com/8photo