Најновиот извештај на Меѓународниот монетарен фонд, оценува дека економиите на земјите од Западен Балкан, заостануваат зад останатите некогашни комунистички земји, а најголем проблем со кој се соочуваат е невработеноста. Од ММФ посочуваат дека приоритети за Македонија треба да бидат инфраструктурата, технолошката подготвеност, развојот на финансискиот пазар, здравството и образованието во кои се потребни реформи. ,, Мора да ги задржат добрите нешта: ниска инфлација, и понатаму мора да работат на контрола на фискалниот дефицит и над се потребни се реформи. Треба да се продолжи либерализацијата на економијата”- изјави Пол Томсен, директорот за Европскиот оддел во ММФ. Во извештајот се напоменува дека Македонија, Албанија, Босна и Херцеговина, Хрватска, Косово, Црна Гора и Србија мора да го завршат процесот на реформи и транзиција, кои според ММФ се ограничени дури и поради политичките релации. ,,Она што е разочарувачки е темпото на структурните реформи предизвикани од комбинација од фактори како што се заморот од реформи, отпорот поради разни интереси, тешките политики кои ги ограничуваат реформските напори и се уште нереализираното членство во Европската Унија” – стои во извештајот. Подобрување на животниот стандард, зголемување на вработеноста, намалување на буџетскиот дефицит и јавниот долг и инвестирање во сектори што ќе го зголемат извозот, се клучните пораки што денеска ги испратија претставниците на ММФ.