Со ниту еден глас против словенечкиот парламент го прифати законот за реформи на досегашниот пензиски систем со кој се предвидени построги услови за заминување во пензија. Новиот закон околу пензиското и инвалидското осигурување треба да стапи на сила на почетокот на 2013-та и со него се зголемува старосната граница за пензионирање на 65 години и за мажи и за жени. Законот предвидува и помлади осигуреници да се пензионираат доколку имаат 40 години работен стаж, но не и пред 60 години живот. Со новите реформи би требало следната година да се заштедат околу 150 милиони евра. Како што посочи министерот за труд и социјална политика Андреј Визјак, новиот систем ќе треба да овозможи пензиите повеќе да не паѓаат во однос на просечната плата.