Погрдни зборови со вулгарна содржина напишал некој пред домот на пратеничката Љубица Буралиева во скопската населба „Ѓорче Петров“. На нејзината влезна врата бил исцртан и симбол на долар. Случајот е пријавен во полиција, а по сторителите се трага. Буралиева е една од трите опозициски пратенички кои одлучија да не ја почитуваат одлуката за бојкот и се вратија во Собранието. Буралиева вели дека е сериозно вознемирена од инцидентот, но не е изненадена затоа што не било првпат да добива закани откако се одлучила да не го бојкотира Собранието. Според неа, заканите секогаш доаѓаат по написите на еден новинар од еден портал, а истрагата треба да покаже дали има поврзаност. Таа не сакаше да открие за кој новинар и веб портал мисли, но нагласува дека веќе нема да молчи за притисоците.