Опозицискиот лидер Зоран Заев денеска оствари средба со полскиот амбасадор во земјава Јацек Мултановски. Од кабинетот на Заев велат дека на средбата се разговарало за актуелната политичка ситуација во Македонија и условите што треба да се исполнат за фер и регуларни избори. Заедничка е оценката дека се неоходни фер избори, за Македонија да се врати на демократскиот европски пат од којшто застрани и дека мора да се исполнат договорените предуслови, соопштуваат од СДСМ. „Веќе за сите е јасно колку фантомски гласачи има во Избирачкиот список. Граѓаните деновиве и практично се уверија во тоа откако е јавно објавен од ДИК актуелниот Избирачки список. Секојдневно реагираат за разни воочени неправилности и злоупотреби. Ова само потврдува дека клучно за фер и регуларен изборен процес потребен е чист и доверлив Избирачки список“, рече Заев. Тој исто така ја истакна потребата од регулација на медиумите коишто во најголем дел се под целосна контрола на власта, а разговарале и за   механизмите што ги употребува власта на ВМРО-ДПМНЕ во обид да го дефокусира вниманието од отворените истраги против нивни високи функционери. „Се обидуваат со разни притисоци и измислици, се обидуваат да поттикнат меѓуетнички тензии. Тоа на актуелната власт повеќе не и поминува кај граѓаните“, истакна Заев. Во фокусот на разговорот биле и предизвиците и начините на справување со бегалската криза со којашто се соочуваат Македонија, регионот и Европската унија.