Лидерот на опозицискиот СДСМ Зоран Заев денеска се огласи со нова пресконференција по вчерашната објава на аудио снимки со кои го обвинува лидерот на ВМРО-ДПМНЕ и актуелен премиер Никола Груевски дека зел кеш за продажбата на Македонска банка на српскиот бизнисмен Јовица Стефановиќ-Нини. Според Заев, по ваква објава „во нормална земја, политичари од таков калибар веднаш поднесуваат оставка и веднаш заминуваат од политичката сцена“, додека Груевски избрал да тврди дека снимките се монтирани. „Дали се монтажи или не, прво граѓаните имаа прилика да ги слушнат и секој може да донесе оценка. Ако му е потребно на Груевски да докажува дали се монтажи или не , снимките се јавно достапни насекаде, може да ангажира најсовремени институции од каде било во светот, да му покажат дали овие снимки се монтажа или не. Секако, спецификата на гласот и на неговото зборување, дополнително потврдува дека не се работи ниту за монтажи, ниту за какви било креации, туку за одговорен пристап на опозицијата, којашто е должна се што има да сподели со јавноста. Така е и по закон, затоа што јавноста е должна да знае со кого си има работа, на кого би дала поддршка во иднина и како тоа би се одразило врз идниот живот на сите граѓани на Република Македонија“, вели Заев.