Премиерот Зоран Заев за годинава најави зголемување на минималната плата, поврат на ДДВ за граѓаните, почеток на изградбата на клиничкиот центар и на автопатот Скопје-Блаце. Откако се изгласаа уставните измени, вели дека сега е потребно многу работа дома. 

Кажа дека ќе почне да се реализира и деценискиот енергетски проект за изградба на хидроцентралите Чебрен и Галиште. Доколку се реализира сето ова тој очекува раст на економијата уште поголем од планираниот.

„Уште денеска влегуваме во една економска и реформска иницијатива која што е високо на нашата агенда во 2019 година. Да ги убедиме сите инвеститори кои досега се двоумеа дека сега имаат безбедна земја партнер, пријателска земја за бизнис и за нови вработувања за нашите граѓани“, изјави Заев.

Овој економски поход ќе даде вистински резултат, додаде Заев само ако се работи чесно и одговорно и без корупција.