Лидерот на СДСМ, Зоран Заев, по повод Меѓународниот ден на Ромите, упати честитка до припадниците на ромската заедница во земјава во свое и во име на партијата, и ги повика да се борат за достоинствен живот и слободна Македонија.

Овој ден на Ромите каде и да живеат во светот е потсетување на цивилизациските придобивки и поттик за натамошен развој, вели Заев.

„Ромите во Македонија се рамноправни граѓани во оваа земја и државата има обврска да ги обезбеди и штити нивните права. Во земјава, последниве 10 години се загрозени и погазени основните човекови права и слободи без разлика на различноста на граѓаните по каква било основа.  Секако целата јавност е сведок како тоа несовесно и насилно владеење на малата група на власт, посебно брутално и безобразно се рефлектирало врз нарушување и на правата на граѓаните Роми“-  стои во честитката. Заев ги повика Ромите, да ги кренат главите, да застанат цврсто и одважно, да се придружат, за себе, за своите деца, за своите семејства, во редовите на „оваа историска битка за слободна Македонија и достоинствен живот“.

И претседателот на Република Македонија, Ѓорге Иванов, по повод 8 април - Меѓународниот ден на Ромите, упати честитка до припадниците на ромската заедница во Република Македонија во која вели дека овој значен празник е можност за прослава на различноста, но и за евалуација на степенот на вклученост на ромската заедница во општествените текови.

Претседателот на Собранието, Трајко Вељаноски во честитката наведе дека  Македонија е една од државите кои се активно вклучени во подобрување на социо-економскиот статус и општествената вклученост на Ромите.