На своето обраќање во Универзална сала, вечерва, лидерот на опозицијата Зоран Заев побара да се формира преодна влада која ќе организира фер и демократски избори. ,, Обврска на преодната влада ќе биде да обезбеди целосно одвојување на власта од институциите и нивно департизирање по сите линии како основен предуслов за демократски избори. Ќе мора веднаш да започне јавна, транспарентна и непристрасна истрага со вклученост на меѓународната заедница”- истакна Заев. Опозиционерот Заев нагласи дека Владата веќе нема легитимитет и му порача на премиерот Никола Груевски да не мисли да се заканува и уценува. ,,Оваа Влада повеќе нема легитимитет, оваа Влада повеќе не е Влада на Република Македонија. Барам Владата на Груевски, јавниот обвинител Зврлевски, раководниот тим на МРТВ веднаш да поднесат оставка.“ рече Заев.