Во соседна Грција дојде до забуна по наводната информација на грчкиот портал „Њупост“ дека Владата го менува ставот кон Македонија и ќе ги признае македонските пасоши.

Веста на порталот доаѓа од погрешно толкување на документ од Министерството за внатрешни работи кој се однесува на пасоши од трети земји, а не на Македонија. Документот кој го објави порталот е од 22 август од грчкото Министерство за внатрешни работи и цивилна заштита, до грчката служба за проверка на пасоши, и во него се потенцира дека грчките гранични служби може без проблем да ставаат грчки печат на влез и излез во странските пасоши, односно пасоши од држави од трети земји во кои има печат и од македонските гранични служби.

Од грчкото Министерство за надворешни работи ја демантираа информацијата и велат  дека нема промена на нивната политика во врска со Македонија и македонските пасоши. Со ова останува досегашната пракса да се ставаат печати на посебно ливче се додека не се надмине спорот за името, поради кој Грција не ги признава македонските пасоши.