Албанската дијаспора во Берлин организираше протести против пресудата за случајот „Монструм“ во Македонија, а протести се организираат и пред македонските амбасади во Тирана в петок и во Приштина денеска.

Македонските амбасади се под засилено полициско обезбедување. Протестите се организираат на Фејсбук, преку посебна страница „Етничка Албанија“, под мотото „Да протестираме за нашите браќа Албанци“, а ги поддржаа и повеќе личности од јавниот живот, политичари и естрадни ѕвезди.

Освен за пресудата „Монструм“, организаторите велат дека протестот е одраз на осуда за „бруталната полициска акција и тортура на полицијата врз Албанците во Скопје“.

Протестите ги поддржа и поранешниот албански премиер Сали Бериша, кој смета дека тие претставуваат „легитимна реакција на растечката албанофобија во земјава“.

„Ги повикувам меѓународните институции и пријателските земји да дадат помош со цел да им се стави крај на албанофобните пракси во Македонија“, порача Бериша на Фејсбук.

По британската Влада, и американскиот Стејтдепартмент ги предупреди своите граѓани за протестите што се случуваат во Македонија по пресудата за „Монструм“.

„Би сакале да ги потсетиме граѓаните на САД дека дури и собири кои се предвидени да бидат мирни, може да ескалираат во насилство. Избегнувајте области каде има собири и бидете претпазливи во близина на било какви големи собири, протести, или демонстрации“, стои во соопштението.