Инфлацијата во САД скокна на 3,8 отсто поради зголемувањето на цените на енергенсите поради војната со Иран. 

Цените во Соединетите Американски Држави пораснаа во април со најбрзо темпо од мај 2023 година, бидејќи потрошувачите сè повеќе ги чувствуваат ефектите од војната во Иран.

Растечките цени на горивата и храната го турнаа индексот на потрошувачки цени (CPI), кој ја покажува стапката на раст на цените во изминатите 12 месеци, на 3,8 отсто.

Ова е највисокото ниво од периодот кога инфлацијата достигна четири проценти пред три години, пишува Би-Би-Си.

Бирото за статистика на трудот на САД (BLS) објави дека речиси половина од вкупното зголемување е резултат на наглото зголемување на трошоците за енергенсите, додека трошоците за домување и храна, исто така, придонесоа за растот.

Војната меѓу САД и Израел од една страна и Иран од друга страна, како и де факто затворањето на клучниот морски премин на Ормутскиот теснец, доведоа до скок на цените на нафтата, што исто така предизвика зголемување на цените на горивата во САД.

Националната просечна цена на галон безоловен бензин достигна највисоко ниво од јули 2022 година од 4,50 долари (3,33 фунти), според податоците од автомобилската асоцијација AAA.

Растот на априлската инфлација, од 3,3% во март на 3,8%, дополнително ја намалува веројатноста Федералните резерви да ги намалат каматните стапки оваа година.

Инвестицискиот менаџер во компанијата „Велт клуб“, Ајзак Стел, оцени дека растот на инфлацијата дури и ја остава можноста за зголемување на каматните стапки „сериозно на маса“, пренесува Банкар.ме.

Овие податоци беа објавени само неколку дена пред Кевин Ворш, кандидатот на претседателот Доналд Трамп, да ја преземе функцијата претседател на Централната банка на САД од Џером Пауел.