За да се надмине политичката криза во Македонија, премиерот Емил Димитриев денеска апелираше на конструктивност од сите политички партии.

Димитриев вели дека партиите имаат средби на разни теми и се надева кога ќе оценат дека постои суштина и оправданост ќе дојде до нова лидерска средба.

„Јас се надевам и апелирам сите партии да имаат максимална конструктивност се со цел што побрзо да заврши оваа политичка криза која има негативни последици и по економијата и по другите сфери на општественото живеење. Ние како Влада работиме максимално посветено на нашите програмски определби кои значат подобри стандарди во сите области на човековото живеење, така што очекувам и партиите со својата конструктивност да придонесат да излеземе од оваа криза“ - изјави Димитриев.

Тој денеска со министерот за труд и социјална политика Диме Спасов и директор на Агенцијата за вработување, Влатко Поповски беа во посета на фабриката „Милина свитс“ во Индустриската зона во Штип, за да го означат почетокот на владиниот проект „Македонија вработува 2“.