Српскиот претседател Александар Вучиќ изјави дека премиерот Ѓуро Мацут добил покана да присуствува на Стратешкиот форум во Блед, но дека бил во право што не присуствувал на собирот, нагласувајќи дека Србија има поважни и поконкретни разговори на највисоко ниво во Пекинг.

„Тие ги поканија своите блокатори да дојдат во Блед, да бидат нивни гости таму, па нека разговараат со нив за стратешки прашања. Ја слушам таа приказна веќе 13, 14 години – како овие блокатори ќе ја преземат власта во Србија“, изјави Вучиќ пред новинарите во Пекинг, коментирајќи ги шпекулациите на некои медиуми дека направил грешка што не присуствувал на форумот во Словенија.

Вучиќ ја спореди важноста и содржината на средбите што можеше да ги има во Блед со оние што се одржаа во Кина. „Ако ги споредите разговорите со Андреј Пленковиќ и некои други лидери, кои ги имав безброј и слушнав секакви глупости, со средбите што ги имав тука - со претседателот Си, претседателот Путин, Роберт Фицо, Шавкат Мирзијоев, Илхам Алиев, Прабху Субианто - тоа е како да се споредува Премиер лигата и Белградската зона“, рече српскиот претседател.

Тој додаде дека ако отишол во Блед, истите медиуми ќе пишувале дека морал да оди во Пекинг. „Не ги интересира местото ниту суштината. Немаат поим. Ако Путин кажел нешто лошо за Србија, тоа би била главна вест за нив. Ако каже нешто добро, тогаш Вучиќ е антиевропски, пропутин. Јас се водам само од интересите на Србија и како да ја заштитиме нашата земја.“

Српскиот претседател нагласи дека теми како што се долгорочните снабдувања со енергија и примената на нови технологии се многу поважни за иднината. „Важно е да знаеме како Србија ќе обезбеди гас, електрична енергија и како ќе ја користи вештачката интелигенција десет години однапред, бидејќи мора да бидеме во чекор со светот“, нагласи Вучиќ.

Вучиќ присуствуваше на голема воена парада во кинеската престолнина по повод 80-годишнината од победата во Втората светска војна, на која беше претставена најсовремената воена опрема на Народна Република Кина.