Сметав дека договорот е добар и тоа го сметам и денес, вели српскиот претседател Александар Вучиќ за договорот меѓу Скопје и Атина. 

Сепак, додава дека не го потценува народот во Македонија кој според него, испратил јасна порака.

„Сметам дека секој договор е многу важен за народот на обете земји. Ние не се мешавме во внатрешните работи на двете држави, иако и јас како претседател и Владата го поддржаа договорот“- изјави Вучиќ на прес-конференцијата по средбата со известителот на Европарламентот, Дејвид Мекалистер.

Тој, меѓутоа рече, дека не е слеп за да не гледа што се случило и која е пораката на народот, пренесува Танјуг.

„Народот во Македонија донесе јасна и недвосмислена одлука и нема, како некои други да ја игнорирам“- вели  Вучиќ.

Додаде  дека посакува сѐ најдобро и успех на Македонија и Грција, затоа што како што рече, се работи за два братски народи.

Во Москва тој неодамна изјави дека Европа треба да ги почитува повеќе малите народи. 

„Стравувам и ми се чини дека некои луѓе од светот не потценуваат нас балканските народи и мислат дека можат се, мислат: ќе видиме ако може со народот, ако не, тогаш не со народот, ќе се обидеме со притисок врз пратениците, ако не може ниту тоа, не е важно, тоа мора да биде така“- изјави Вучиќ додека беше во Русија. 

Наведе дека луѓето од Европа и светот треба да покажат почитување кон малите народи.