„Можете да чуете многу работи од Шекеринска што немаат многу смисла“, критикуваше српскиот претседател Александар Вучиќ на Минхенската безбедносна конференција, коментирајќи ја изјавата на заменик-генералниот секретар на НАТО, Радмила Шекеринска, дека Хрватска и Албанија се сигурни партнери на НАТО и дека нивната воена соработка има за цел да придонесе за стабилноста во регионот. РТС објавува.

„За жал, Радмила Шекеринска зборуваше и за други работи што навистина немаат многу смисла“, рече Вучиќ, додавајќи дека, според него, таа сакала да ја критикува Република Српска кога изразила загриженост за сецесионистичките изјави и одлуки во регионот.

Тој рече дека оние кои зборуваат за регионот треба да покажат поголемо почитување кон Србите и да бидат внимателни со своите изјави.

Заменичката генерална секретарка на НАТО, Радмила Шекеринска, изјави дека Хрватска и Албанија се сигурни и посветени сојузници на Алијансата, кои активно придонесуваат за зачувување на регионалната стабилност, додавајќи дека НАТО не е вклучен во разговорите за можен воен сојуз меѓу Тирана, Приштина и Загреб.

Во интервју за агенцијата Бета, таа нагласи дека членството во НАТО не претставува пречка за сојузничките земји да склучуваат дополнителни одбранбени договори со трети страни.

„Она што генерално го гледаме е дека глобалната геополитичка ситуација има влијание и врз регионот. Забележливо е зголемување на бројот на воени вежби и инвестиции во одбраната и безбедноста. Но, секогаш ги охрабруваме сојузниците и партнерите да се вклучат во политички дијалог и во решавање на отворените прашања во регионот. Нашето присуство на Западен Балкан има за цел да го поддржи токму тој процес“, рече таа.

Според Шекеринска, Албанија и Хрватска не се само сигурни членки на Алијансата, туку и значајни актери во одржувањето на мирот. Таа истакна дека двете земји учествуваат во мисијата КФОР, но и дека генерално се фокусирани на поддршка на агендата за стабилизација во регионот.

Изјавите доаѓаат во контекст на реакциите од Србија, откако претседателот Александар Вучиќ постојано оценуваше дека евентуалното здружување на силите меѓу Албанија, Хрватска и Приштина претставува директна закана за неговата земја.