Вучиќ би го признал Косово ако за возврат ја добие Република Српска, изјави поранешниот косовски политичар Азем Власи. 

Вели дека Европската Унија е само посредник во дијалогот на Косово и Србија, а клучна улога за успешното завршување на овој процес ќе имаат Соединетите Американски Држави. Власи објасни дека евентуалната автономија за северот на Косово, актуелна во „нон-пејпер“ документите, е неприфатлива и штетна за Србите јужно од Ибар.

Според него, тие нон-пејпери се всушност памфлети за провокации, а ние во регионот лесно се лепиме за тоа. 

„Нешто што нема автор, адреса, фирма, сериозната политика и политичарите не ги земаат сериозно. Заговарањето автономија за северот на Косово е всушност идеја за одвојување на тој дел од целината на Косово. Нема никаде автономија со четири мали општини и нешто повеќе од 30.000 жители. Таквите идеи се глупост и играње со судбината и опстанокот на косовските Срби на просторите каде што живеат. Косово инаку тоа нема да го прифати, па ете нови проблеми и конфликти, повторно на штета на Србите“, кажа тој во интервју за Косово онлајн.

Тој додаде дека, доколку има продолжување на дијалогот на Белград и Приштина во јуни, тоа ќе бидат „прелиминарни разговори“ и дека „ништо конкретно“ нема да се случи.

Во последно време се појавија три нон пејпери, кои ги таргетираа БиХ и Косово. 

Според последниот нон пејпер, Косово треба да остане во Србија уште 99 години.