Еврото утринава падна под 0,99 долари, што е најниско ниво во последните 20 години, по минатонеделната најава дека Русија ќе ја намали испораката на гас за Германија преку гасоводот Северен тек.

Еврото падна за 0,7 отсто на 0,9884 долари во раната трговија, што е најниско ниво од декември 2002 година.

Еврото се тргува под паритет во последните две недели. Ова не е првпат вредноста на еврото во однос на доларот оваа година да се намалува. Еврото падна за повеќе од 12 отсто во однос на доларот. Високата инфлација и ниската доверба на потрошувачите доведоа до вкавата промена.

Европската валута потоа продолжи да слабее во однос на доларот, под влијание на економските турбуленции и неизвесностите предизвикани од руската инвазија на Украина, пренесува RTE.ie.

Рускиот гасен гигант Газпром во петокот објави дека гасоводот Северен тек 1, кој требаше да биде отворен викендов, ќе остане затворен на неодредено време.

Се вели дека е откриено „истекување масло“ во турбината за време на планираната тридневна операција за одржување и дека гасоводот ќе остане затворен додека не се поправи. Во саботата требаше да продолжи продолжувањето на испораките на гасоводот што тече од Санкт Петербург до Германија под Балтичкото Море.

По новата најава на Русија за прекин на снабдувањето, дојде до скок на цените на енергијата.