Членовите на Комисијата за надворешна политика на Европскиот парламент утре во 9 часот во Брисел ќе гласаат за усвојувањето на овогодинешниот извештај за Србија.

На нацрт-извештајот што во април го презентираше известувачот на Европскиот парламент за Србија, Владимир Билчик, беа поднесени 439 амандмани, а пратеничките групи усвоија 40 компромисни амандмани со кои се прошири текстот на извештајот.

Во фокусот на својот извештај за Србија оваа година, Европскиот парламент го повика Белград „итно“ да се усогласи со санкциите воведени од ЕУ против Русија и Белорусија и го постави тоа како еден од условите за натамошен напредок на Србија на патот кон европската интеграција.

„Се повикуваат српските власти вистински да се вклучат во неопходните реформи и да ја вратат земјата на вистинскиот пат на евроинтеграциите и на тој начин да ги исполнат европските аспирации на Србија“, се наведува во текстот.

Извор: Блиц.рс