Американските берзи во април забележаа силен раст каков што не е виден со години, поттикнат од добрите финансиски резултати на големите компании, и покрај притисокот од енергетската криза и геополитичките тензии.

Во четвртокот, главните индекси на Волстрит пораснаа за околу еден процент. Dow Jones се зголеми за 790 поени или 1,63 отсто, достигнувајќи 49.658 поени, S&P 500 порасна за 1,02 отсто на 7.209 поени, додека Nasdaq забележа раст од 0,99 отсто и достигна 24.892 поени.

На месечно ниво, растот е уште поизразен. S&P 500 порасна за 10,4 отсто – најдобар резултат од ноември 2020 година, Nasdaq скокна за 15,3 отсто – најсилен раст од април 2020 година, додека Dow Jones се зголеми за 7,1 отсто.

Најголем придонес за растот на Dow Jones имаше индустрискиот сектор, предводен од акциите на Caterpillar, додека растот на Nasdaq беше поддржан од Alphabet.

Четири технолошки гиганти поврзани со развојот на вештачка интелигенција – Alphabet, Amazon, Meta и Microsoft – објавија резултати кои ја одбележаа берзанската недела. Акциите на Alphabet пораснаа поради рекордни резултати во cloud-сегментот, додека Meta и Microsoft забележаа пад поради загриженост околу високите трошоци за инвестиции во вештачка интелигенција.

По затворањето на берзата, Apple соопшти дека во првиот квартал остварил приход од 111,18 милијарди долари и заработка од 2,01 долар по акција, над очекувањата на аналитичарите. Компанијата најави раст на продажбата од 14 до 17 отсто во следниот квартал, што доведе до раст на акциите од околу три проценти во тргувањето по работното време.

Во исто време, цените на нафтата благо се намалија. Барел нафта од типот Брент се тргуваше за околу 110,86 долари, додека американската WTI достигна 105,4 долари.

Економските податоци покажуваат дека американската економија пораснала за два отсто во првиот квартал од 2026 година, а бројот на барања за надоместок за невработеност паднал на најниско ниво од 1969 година. Сепак, инфлацијата останува над три проценти, главно поради високите цени на енергенсите.

• Засега инфлацијата ја сметаме за привремена, но ако војната продолжи и цените на енергијата останат високи, таа може да стане трајна и сериозен проблем за Федералните резерви – изјави Питер Кардило од Spartan Capital Securities.

И европските берзи го следеа позитивниот тренд. Германскиот DAX порасна за 1,41 отсто, францускиот CAC за 0,53 отсто, а британскиот FTSE за 1,62 отсто.