На Вол Стрит, берзанските индекси ги загубија сите добивки од претходниот ден, бидејќи инвеститорите се загрижени поради пораките дека Федералните резерви на САД би можеле да ја заострат монетарната политика поагресивно од очекуваното.

Dow Jones падна за 280 поени или 0,80 отсто, на 34.641 поени, додека S&P 500 се лизна за 1,26 отсто на 4.525 поени, а индексот Nasdaq 2,26 отсто на 14.204 поени.

Откако претходниот ден драстично порасна, технолошкиот сектор вчера падна за речиси два отсто. Акциите на технолошките гиганти како Apple и Amazon беа под притисок.

Цените на акциите пораснаа во дефанзивните сектори

Од друга страна, цените на акциите пораснаа во дефанзивните сектори, како што се недвижностите и услугите.

Гувернерката на ФЕД, Лаел Брејнард очекува методично зголемување на каматните стапки и брзо намалување на билансите на ФЕД за да ја доведе монетарната политика во „понеутрална позиција“ подоцна оваа година.

Ова ги зголеми стравувањата дека ФЕД може да биде уште поагресивен од очекуваното во борбата против инфлацијата.

Највисока инфлација во САД во последните 40 години

Бидејќи инфлацијата во САД со месеци е на највисоко ниво во последните 40 години, ФЕД неодамна ги зголеми клучните каматни стапки за прв пат од 2018 година, за 0,25 процентни поени, и може да ги зголеми до мај за дополнителни 0,50 проценти поени.

Инвеститорите стравуваат дека темпото на зголемување на каматните стапки ќе биде уште поагресивно од очекуваното, што може да го забави растот на најголемата светска економија, па дури и да предизвика рецесија.

„По коментарите на Лаела Брејнард, се чини дека ФЕД ќе биде поагресивен. Ова секако имаше негативно влијание врз берзата бидејќи ги оправда стравувањата од можна рецесија, вели Кристина Хупер, стратег во Инвеско.

И на повеќето европски берзи цените на акциите вчера паднаа. Додуша, лондонскиот FTSE индекс зајакна 0,73 отсто, на 7.613 поени, но франкфуртски DAX се лизна за 0,65 отсто, на 14.424 поени, а париски CAC 1,28 отсто, на 6.645 поени.