Војната на Блискиот Исток може да доведе до нагло зголемување на инфлацијата во еврозоната и да го забави економскиот раст, изјави главниот економист на Европската централна банка, Филип Лејн, за британскиот весник „Фајненшл тајмс“.

Војната што САД и Израел ја почнаа во саботата против Иран се интензивираше во понеделник, без крај на повидок, бидејќи Израел го нападна Либан, а Иран продолжи со нападите врз земјите од Персискиот Залив, зголемувајќи ги цените на нафтата за повеќе од 10 проценти.

„Сè на сè, повисоките цени на енергијата вршат притисок врз инфлацијата, особено на краток рок, а таков конфликт би бил штетен за економската активност“, рече Лејн.

Според него, обемот на влијанието врз инфлацијата на среден рок зависи од обемот и времетраењето на конфликтот.

„Претходните анализи на ЕЦБ покажаа дека таквата војна би довела до нагло зголемување на инфлацијата поврзана со енергијата и значителен пад на производството доколку снабдувањето со енергија во регионот остане нарушено“, рече Лејн.

Друга анализа спроведена од ЕЦБ во декември сугерира дека континуираниот пораст на цените на нафтата може да ја зголеми инфлацијата за 0,5 проценти и да го намали економскиот раст за 0,1 процент.

foto freepik.com