Папата Францис на 16 април ќе го посети грчкиот остров Лезбос, објави Ватикан.

Тој ќе направи еднодневна посета во знак на поддршка на бегалците и да привлече внимание на првата линија на европската мигрантска кризa. Лани илјадници бегалци од Сирија, Ирак и Авганистан поминаа преку овој остров на Егејското Море. Но, според договорот меѓу ЕУ и Турција, грчките власти почнаа да ги враќаат бегалците во соседна Турција.  Портпаролот на Ватикан, отецот Федерико Ломбарди изјави дека Папата сака да покаже чувство, солидарност и одговорност.

Папата повеќепати изрази поддршка за бегалците, повикувајќи ги католиците во Европа да им дадат засолниште на семејствата на имигрантите.