Шефот на државата Ѓорге Иванов го формираше новиот Совет за безбедност, телото задолжено да ги анализира безбедносните ризици во земјава. Покана за средба во Вилата Водно Иванов упати до премиерот Никола Груевски, собранискиот спикер Трајко Вељаноски, министерот за одбрана Зоран Јолевски, министрите за внатрешни и за надворешни работи Гордана Јанкулоска и Никола Попоски. Во новиот состав, освен функционерите кои учествуваат по функција, нови членови се поранешната пратеничка на ДПА Флора Кадриу и претставникот на Нова Демократија Насер Сејдини. Од стариот состав останува и Вели Креци. Единствено нема претставник од ДУИ. Партијата на Ахмети не го признава легитимитетот на Иванов добиен на последните претседателски избори, затоа што истиот бил освоен без гласовите на Албанците. Во минатиот состав на Советот за безбедност претставник на ДУИ беше Абдилаќим Адеми.