Венецуела очекува производството на нафта во 2017 година да остане на 23-годишен минимум. 

Три години рецесија и високите цени доведоа до вонредна состојба за поголемиот дел од населението. 

Венецуелската државна енергетска компанија PDVSA очекува производството на нафта во земјата во 2017 година да остане на 23-годишен минимум, соопшти агенцијата Ројтерс, повикувајќи се на интерен документ со кој располага.

PDVSA која ги генерира речиси сите приходи од извоз и е финансискиот мотор на социјалистичката влада, проценува дека производството е намалено за 10% во 2016 година поради кризата во економијата и ниските цени на нафтата.

Слабата финансиска состојба на компанијата предизвикува проблеми во оперативната работа и така уште повеќе се продлабочува падот во економијата на оваа јужноамериканска земја. Три години рецесија и високите цени доведоа до вонредна состојба за поголемиот дел од населението. Според голем број економисти БДП во 2016 година се намалил за над 10%.

Во 2017 година PDVSA очекува принос на ниво од 2,501 милиони барели дневно, што е раст од само 5.000 барели за првите 11 месеци од 2016 година, покажуваат податоците во 9-годишниот стратешки план претставен во декември.

Извозот за Кина, кој обезбедува на Венецуела над 50 милијарди долари за децении се очекува да се зголеми за 55% во 2017 година и да достигне 550.000 барели дневно.

Испораките до Индија сепак ќе се намалат со 15,5% до 360.000 барели дневно.