Германските граѓани кои бараат нов стан се соочуваат со рекордно зголемување на кириите, бидејќи рекламираните кирии во големите градови пораснале речиси четири пати побрзо од реалните заработки, според најновиот извештај на порталот за недвижности Immowelt.

Според официјалните податоци, платите во Германија бележат кумулативен раст од само 5,1 процент во последните три години, додека цените за изнајмување во одредени градови скокнаа до 20 проценти, објавува „Билд“.

Хамбург забележа најголем раст на цените за изнајмување, кои се зголемија за 20,2 проценти од 2023 година. Високи стапки на раст се забележани и во Дрезден (18 проценти) и Франкфурт на Мајна (17,7 проценти). Аналитичарите предупредуваат дека трендот на раст на цените ги достигнал и секундарните пазари, односно градовите кои се сметале за попристапни, како што се Дуизбург (16 проценти) и Есен (15,4 проценти).

Минхен продолжува да биде најскапиот пазар во земјата, каде што просечната рекламирана нето кирија (без комуналните трошоци) е рекордни 21,44 евра за квадратен метар, што значи дека изнајмувањето просечен стан од 75 квадратни метри месечно денес чини околу 218 евра повеќе отколку пред три години. Франкфурт (190 евра) и Хамбург (175 евра) забележаа значително зголемување на фиксната месечна цена за кирија.

Кризата за домување во Берлин е исто така алармантна и стана политичко прашање пред изборите за Претставничкиот дом, кои се одржуваат за три месеци. Иако цените за кирија во главниот град растеа побавно во споредба со другите градови(11,9 проценти), просечната цена по квадратен метар достигна 14,39 евра. Бидејќи просечните заработки во Берлин се под федералниот просек, експертите предупредуваат дека овој скок на цените директно го загрозува егзистенцијалниот минимум на повеќето домаќинства.

foto Wikipedia/Dietmar Rabich