Во Европската Унија(ЕУ), 6,5 проценти од вработените работат најмалку 49 часа неделно. 

Општо земено, заклучокот од истражувањето е дека Западна и Северна Европа имаат пократка работна недела од Јужна и Источна Европа.

„Рандстад“, меѓународна компанија за вработување и управување со човечки ресурси, спроведе големо истражување со цел да утврди колкав процент од вработените во европските земји работат 49 или повеќе часа неделно.

Просекот во Европската Унија во последниот квартал од минатата година изнесуваше 6,5 проценти, со просечна работна недела од 35 часа во јавниот сектор и 40 часа во приватниот сектор.

На врвот на листата се вработените во Грција, каде што 12,4 проценти од нив работеле најмалку 49 часа неделно во споменатиот период, по што следат Кипар со десет и Франција со 9,7 проценти.

На четврто место е Португалија, каде што оваа бројка, пренесува „Еуроњуз“, е 9,1 процент.

Студијата, исто така, наведува дека станува збор претежно за висококвалификувани работници, односно експерти, додека овој процент е значително поголем кај самовработените (27-29 проценти).

„Рандстад“ предупредува дека премногу работни часови обично ја намалуваат продуктивноста и честопати доведуваат до „прегорување“, а компаниите што очекуваат таков ангажман од своите вработени редовно се соочуваат со поголем број откази.

На другиот крај од спектарот се Бугарија и Латвија со 0,4 и еден процент од вработените што работат 49 или повеќе часа неделно, додека во Хрватска, според податоците на Евростат, има четири до пет проценти, пренесува Bankar.me.

foto freepik.com/senivpetro