Синоќа почина лекарот кој беше ранет во нападот во општата болница во словенечкиот град Изола.

Тој стана трета жртва на нападот, по полицаецот кој беше убиен во самата болница и напаѓачот кого го уби полицијата во обидот да избега со автомобил, пренесуваат словенечките медиуми.

Напаѓачот влегол околу 15 часот во болницата во Изола и пукал. Убил сообраќаен полицаец кој во болницата бил поради увид од сообраќаен прекршок и се симнал од еден од погорните катови кога слушнал истрели, а лекар и уште ден полицаец беа тешко ранети.

Мотивите за нападот засега не се познати. Очевидци велат дека напаѓачот влегол со листа на лекари кои сакал да ги убие. Убиениот лекар, 36-годишниот уролог со мексиканско и словенечко државјанство Луис Гилермо Мартинез Бустаманте, според очевидци случајно се нашол со убиецот, но велат дека тој се распрашувал за него.

Според последните сознанија добиени од очевидци, 70-годишниот Дарко Грегорич од околината на Копер го барал својот уролог Бустаманте. Напаѓачот бил од соседно село и тој и е познат на полицијата затоа што лежел затвор заради вооружен грабеж на пошта. Словенечките власти најавија заострување на безбедносните мерки за полицајците и персоналот во болниците.