Поплавени села без жители, тоа е сликата за Славонија, која се бори со најголемите досега забележани поплави, кои однесоа и еден човечки живот, јавува Хрватската радио-телевизија.

Во Рајево Село пронајдено е телото на еден маж, а две лица се сметаат за исчезнати.

Евакуирани се вкупно 15 илјади лица од Рачиновац, Рајево Село, Гуње, како и голем дел од населението на Бошњак, Врбањ и Дреновац. Сите се сместени во спортските сали на основните училишта во Жупањ, Градиште и Церн, како и во прифатни куќи.

Од поединечни делови на Славонски Брод, на кои им се закануваат поплави од Сава и нов воден бран, евакуирани се околу 400 лица.

Во акциите за спасување учествуваа стотици припадници на хрватската војска, полицијата, Црвениот крст.

Граничниот премин меѓу Хрватска и Босна и Херцеговина кај Козарска Дубица, синоќа беше затворен. Преминот е затворен за сообраќај поради напукнувањата на мостот, кој ги спојува Хрватска и БиХ, соопшти босанската погранична полиција.

Претходно вчера за сообраќај беа затворени и граничните премини меѓу БиХ и Хрватска кај Босански Шамац, Орашја и Брчко, како и два гранични премини меѓу БиХ и Србија.

Водостојот на Сава и натаму е ектремно висок, споро опаѓа и тешко е да се процени смирувањето на состојбата.

Продолжуваат работите на зајакнување на насипите долж 180 километарскиот тек на Сава во Бродско-посавската жупанија, а моментално најтешка е ситуацијата со насипите од Славонски Кобаш до Славонски Шамац.

Генералниот директор на Хрватски води, Ивица Плишиќ предупреди изутринава дека опасноста се уште не поминала. - Во текот на ноќта имавме воден бран од Уна, успеавме да го амортизираме, со пуштање на водата во Мокро Поље и Лоњско Поље, изјави Плишиќ за Хрватското радио.