Од почетокот на војната во Украина иницирана од Москва, Хрватска била посетена од речиси 50.000 руски државјани, а според пресметките, повеќе од 7.000 од нив се уште живеат во таа земја, пишува Вечерњи лист. Бројот на руски државјани е нешто помал во споредба со истиот период лани, но пристигнувањата не само што не запреле, туку се и релативно многубројни. 

Од друга страна, овој голем број Руси во Хрватска покажува нешто друго - и покрај тоа што официјална Москва ја прогласува Хрватска за непријателска држава, на „обичните“ Руси не им е грижа и доаѓаат. Очигледно само на малкумина им пречи тоа што нема летови од Русија до ниту една дестинација во ЕУ, па доаѓаат со авион преку Србија или Турција.

Може да се каже и дека од почетокот на руската агресија врз Украина, повеќе Руси дојдоа во Хрватска отколку украински бегалци, од кои има околу 20.000.

Треба да се нагласи дека Русите - освен оние кои се на црната листа и кои се под санкции на Европската унија - нормално можат да патуваат низ Унијата, за туризам или од некоја друга причина, и да го користат својот имот што го имаат во Хрватска исто така. 

Инаку прашањето за руските визи и туристичките посети ќе биде тема на состанокот на министрите за надворешни работи на крајот на овој месец во Чешка, земја која претседава со Советот на Европската унија.