Институтот за судска медицина не пронајде никаков отровен гас кај пациентите од гостиварското Средно економско училиште, кои пред неколку дена се пожалија дека непознат сторител фрлил гас во училиштето и се обидел да ги затруе. Анализите не покажаа присуство на никаков отров, солзавец или друга хемикалија кај пациентите кои најпрвин биле примени во гостиварската болница, а потоа дел беа префрлени во Скопје. Претходно и на Клиниката за токсикологија не беа пронајдени хемиски супстанции кај хоспитализираните пациенти, но земените мостри за поголема сигурност беа испратени и на дополнителни анализи во Институтот за судска медицина. Испитувањата биле направени на брисеви и примероци од облеката на учениците, потврди и портпаролот на МВР Иво Котевски. Допрва ќе се одлучува како да се постапи во овој случај и дали некој ќе одговара за предизвиканата лажна тревога. Вкупно 60-тина пациенти, ученици но и професори, во гостиварската болница се пожалиле на отежнато дишење и солзење на очите, а 16-тина од нив беа префрлени на Клиниката за токсикологија во Скопје. Идниот ден тие на сопствено барање ја напуштија Клиниката. Во меѓувреме, Средното економско училиште беше дезинфицирано и во него продолжува наставата.