Исплатените средства за поддршка на повластените производители на електрична енергија од обновливи извори изнесуваат безмалку 42 милиони евра. Распределената повластена тарифа е објавена од операторот на пазарот за електрична енергија МЕМО, преку кој оди исплатата, како и од Регулаторната комисија за енергетика. Сумата, која ја плаќаме преку сметките за електрична енергија, е слична како и ланската.

Претходно Државниот завод за ревизија апелираше да се намали оваа сума, бидејќи најверојатно е превисока за повратниот ефект. 

Просечната цена на продажбата на електрична енергија со повластена тарифа од малите хидроцентрали, соларните и ветерни централи како и од оние на биогас, изнесувала 102 евра по мегаватчас во 2021.

Нивниот број минатата година изнесувал 202 производители кои користат повластена тарифа, а нивното учество во вкупниот инсталиран капацитет во земјата изнесувал 7 отсто со 406 произведени гигаватчасови.

„Просечната цена на електричната енергија, произведена од повластените производители кои користат повластена тарифа, во 2021 година изнесува 6,28 ден./kWh и е најниска од почетокот на примена на повластените тарифи до денес“, велат од РКЕ.

Во 2021 година за произведената електрична енергија од мали хидроелектроцентрали исплатени се 1.109.774.102 денари, а најмногу добиле Јабланица (39.488.660), Тополки 316 ( 36.077.815) и Бистрица 99 (29.049.149) меѓу 97 од нив.

Кај фотонапонските, од вкупно 281.948.908 денари за произведени 22.515.377 kWh, меѓу стотината централи најмногу добиле  Мега Солар (36.743.244), Торпедо Солар (23.867.046) и Лагово (23.022.096, 

За ветерната централа во Богданци се исплатени 566.864.713 денари а за термоелектроцентралите на биогас во Породин, Логоварди и онаа на Везе Шари дадени се 597.067.261 денари за произведени 53.817.744 kWh електрична енергија.

„Карактеристично за 2021 година е тоа што за првпат по воведувањето на повластените тарифи како мерка за поддршка на обновливите извори на енергија, бројот на повластени производители е помал споредбено со претходната година. Причина за ваквиот тренд е тоа што во 2021 година е пуштена само една нова електроцентрала којашто користи повластена тарифа, додека две електроцентрали, една мала хидроелектроцентрала и една фотонапонска електроцентрала, го изгубија својот повластен статус“, објави РКЕ.

А.К.