Бројот на заразени со мајмунски сипаници во Србија и регионот може да се зголеми за време на празничната сезона, предупредуваат епидемиолозите.

Посебна претпазливост се советува ако патувате на егзотични дестинации, како централна и западна Африка - ендемични области на овој вирус.

Д-р Славица Марис, епидемиолог од Институтот за јавно здравје во Белград и раководител на Инфективното одделение, вели дека нема голема причина за страв, бидејќи граѓаните летуваат на дестинации кои се епидемиолошки безбедни:

-Досега во Грција се регистрирани само два увезени случаи на мајмунски сипаници, додека ниту еден не е регистриран во Хрватска и Турција. Значи, тешко дека нашите граѓани ќе се заразат во овие земји и ќе го донесат вирусот дома.

Сепак, епидемиолозите ги загрижува фактот дека патниците од земјите на Европската унија, кои патуваат во егзотични области во многу поголем обем, може да го шират вирусот низ Европа, што би ја загрозило и Србија а и регионот.

- Имајќи предвид дека сексуалниот пат на пренесување на мајмуните сипаници во неендемичните земји е доминантен пат, доколку за време на одморот се избегнуваат ризични сексуални контакти, ризикот од заразување со овој вирус со престој во странство е минимален - истакнува д-р Марис.

Според достапните податоци, неодамна потврдениот случај на мајмунска сипаница кај маж кој допатувал од Германија е првиот случај на оваа инфекција во Србија.

- Факт е дека масовните патувања придонесуваат за зголемување на ризикот од увоз на повеќе заразени, поради што апелираме на одговорно однесување - вели Марис.

Официјалната веб-страница на Светската здравствена организација (СЗО) советува и претпазливост при престој на бројни летни фестивали и други масовни собири, бидејќи мајмунските сипаници се пренесуваат и со контакт кожа на кожа.

Светската здравствена организација претходно изјави дека луѓето помлади од 40-50 години можат да бидат поподложни на мајмунски сипаници бидејќи не се заштитени со вакцината против големи сипаници, која беше присутна се додека оваа болест не беше искоренета.

Најмногу заразени во Британија

Според последниот извештај на Светската здравствена организација од почетокот на овој месец, глобалниот ризик од мајмунска сипаница се проценува на умерен. Како поткрепа на тоа тврдење, тие го изнесоа фактот дека мајмунските сипаници се потврдени во 780 случаи во земји каде што обично не се наоѓа. Најголем број заразени се регистрирани во Велика Британија, од нив 207.