Нема намалување на пензиите на граѓаните, а со одлуката да се вложува во државните хартии од вредност дополнително се обезбедува сигурност на пензиските фондови и пензиите на граѓаните, еврообврзницата се издава за да донесе странски капитал однадвор, за да се подобри ликвидноста, односно да се доведат свежи средства во домашната економија, истакна ВМРО-ДПМНЕ негирајќи ги тврдењата на опозициската СДСМ дека идните пензионери ќе имаат намалени пензии.

„Зоран Јовановски познат по катастрофалните предлози за девалвација на денарот, денеска излезе со нови невистини и шпекулации пред јавноста. Само за потсетување, СДСМ издаде евро обврзници во висина од 150 милиони евра, а во тоа време не се покачуваа пензиите, ниту пак навремено се исплаќаа. Изгледа им пречи покачувањето на пензиите од страна на ВМРО-ДПМНЕ со кое не се дозволува намалување стандардот на граѓаните и затоа СДСМ постојано одат со вакви прес-конференции“, стои во реакцијата на партијата.