Во текот на вчерашниот ден оградата на владината зграда доби позлатени круни.

Според зборовите на владиниот портпарол Александар Ѓорѓиев позлатувањето не чини дополнителни пари, туку е дел од претходниот проект и новите елементи се дел од планираните активности за оградата.

Токму позлатените круни на новата ограда ги револтираше опозиционерите и тие денеска реагираа укажувајќи на фактот дека тендерите и бизнисите се поважни за власта отколку здравјето на граѓаните.

Претседателот на СДММ Богоев Стефан укажа дека тие златни украси и оградата ги чинат граѓаните 690 илјади евра, додека здравствениот систем се распаѓа и секојдневно згаснуваат млади човечки животи .

„За лекувањето на малата Тамара беа потребни дваесет пати помалку од овие пари, односно само 30 илјади евра.

Додека граѓаните немаат за леб и основни услови за живот, за лекување, ВМРО-ДПМНЕ ги позлатува оградите на Владата“, реагираше Богоев.

За оградувањето на владиниот објект надлежните потрошија 690 илјади евра.

(Фотографијата е преземена од Плусинфо)