Со новиот Оперативен план за активни мерки за вработување ќе бидат опфатени 16.226 невработени лица од што Владата очекува околу 8.200 директни вработувања. За спроведување на Оперативниот план е предвиден буџет од 660 милиони денари, информира денеска на прес-конференција вицепремиерот за економски прашања Владимир Пешевски.

Вицепремиерот Пешевски, појасни дека преку овие мерки за вработување ќе има еднаква застапеност при вработувањата меѓу мажите и жените.

Со програмата за самовработување ќе бидат опфатени 960 лица, за поддршка на микро и малите претпријатија за создавање нови работни места 200 лица, со Програмата за условен паричен надомест за субвенционирани вработувања на лица со социјален ризик е предвиден опфат на 136 лица, за субвенционирано вработување на невработени и млади до 29 години преку ослободување придонеси опфатот е 5.000 млади.

„За оваа година е предвиден буџет од 660 милиони денари кој е распореден за финансиска поткрепа за мерките за вработување и самовработување кои се пласирани преку АВРМ. Исто така, предвидено е околу 30 отсто од вработувањата да се однесуваат на младите лица“, изјавил вицепремиерот.

Министерот Спасов, пак истакна дека активните мерки за вработување и самовработување за 2015 година се крупни потфати преку кои се влијае на економската благосостојба во државата.

„Акцентот е ставен на мерките за вработување на млади лица до 29 години за кои е изработена и конкретна програма. На невработените, како и на компаниите на располагање им се сите мерки за намалување на невработеноста во државата“, изјавил Спасов.