Владата потпиша договор со Минстрој, 1000 рудари ќе се вратат во рудниците
Владата и бугарската фирма Минстрој денеска го потпишаа договорот за концесија на рудниците Злетово и Тораница.
Сопственикот на Минстрој најави дека кон средината на мај очекува да биде рестартиран рудникот Злетово, а неколку месеци подоцна и Тораница.
Концесионерот ќе ги исплати сите неисплатени плати и ќе инвестира 10 милиони евра за нова опрема.
„За граѓаните е важно што новиот инвеститор најави дека ќе ги врати на работа сите 1000 вработени во двата рудника. А воедно дека дополнително ќе инвестира во нова и современа опрема со која двата рудника ќе работат успешно и профитабилно“- изјави премиерот Емил Димитриев.
Минстрој холдинг има 2.500 вработени и стопанисува со 6 најголеми рудници во Бугарија.
„Ќе ги вратам на работа уште во месец април, а во месец мај ќе почнеме со работењето и ќе ја имаме првата руда. Имам претстава што треба да се направи, каква техника и опрема треба да се купи и повторувам дека ќе реализирам 10 милиони евра инвестиции“- кажа Николај Валканов, сопственик на Минстрој.
Одлуката Минстрој да ја добие концесијата, ја обжалија две компании-„Минеко“ и „Металфер“. Надлежните велат дека нивните жалби се отфрлени, а изборот на бугарската компанија бил транспарентен и согласно прописите.
Слично
Поврзани вести
