Владата бара консултанти за да ги продаде трите капацитет - фабриката за шински возила „Велес“, позната како „Колска“, прилепски „Еурокомпозит“ и ски-центарот „Попова Шапка“, кои се во државна сопственост.

Оваа услуга ќе ја чини државата 244 илјади евра, а услов за доделување на договорот за консултантски услуги ќе биде најповолната економска понуда, при што цената ќе учествувала со 60 бодови, а квалитетот со 40.

Од Владата велат дека фирмата која ќе го добие тендерот треба да понуди три модели за продажба на овие компании, а Владата ќе одберела еден. Консултантите ќе треба да ги утврдат сопственичките удели во фирмите, долговите, кредитите, како и загубите. Дополнително ќе треба да се увидат и тековните судски спорови кои се водат против овие три фирми како и спорови со државни институции и органи на власта.