Денеска на прес конференција Владата започна нова кампања со која ќе ја  подигнува јавната свест за корисноста од здравата исхрана и здравиот начин на живот, како и применување на физичка активност.

Под мотото „Здравјето е избор“ премиерот Никола Груевски истакна дека преку оваа кампања, Владата сака да ја подигне свеста кај луѓето на повисоко ниво и додаде дека во Македонија има доволен избор на здрава храна која му е потребна на организмот, а може и да се спортува без поголеми трошоци.

Тој истакна дека е од голема важност внесувањето на овошје и зеленчук, кое штити од прерана смрт и тешки болести. Груевски додаде дека целозрнестите житарки како што се пченка, пченица придонесуваат за поквалитетен и подолг живот. Протеините се истотака значајна група во исхраната, а како најдобар избор, премиерот ги посочи рибата и пилешкото месо.

Консумацијата на сол во текот на денот за возрасните луѓе, не треба да биде повеќе од шест грама, а кај децата и помалку, бидејќи според анализите солта го покачува крвниот притисок, напомена премиерот додавајќи дека лошата исхрана и недоволната физичка активност придонесуваат за зголемена или прекумерна телесна тежина.

Премиерот информираше дека во земјава 60,5 отсто од мажите и 47, 8 отсто од жените над 20 години односно 52,8 од вкупното население имаат зголемена телесна тежина, а околу 20 отсто имаат прекумерна телесна тежина. Овој проблем се јавува и кај децата, а главен причинител за тоа е употребата на брза храна.

На крај премиерот порача да се практикува редовна физичка активност за подобрување на здравствениот и имунолошкиот систем.