Италијанската индустриска групација „Витило“ ќе инвестира нови 10 милиони евра во земјава во третата фаза од планираната инвестиција, соопштија од Владата. Премиерот Зоран Заев и Јован Деспотовски, директор на Дирекцијата за ТИРЗ, се сретнале со раководството на компанијата, сопственикот и управител Антонио Витило и Чиријако Ло Конте, директор на „Витек Македонија“.

Од кабинетот на премиерот соопштуваат дека претставниците на италијанска групација „Витило“, позната во автомобилската индустрија, ќе инвестирале во градење и во нови машини за потребите на автомобилската индустрија и на други индустрии, а производството од нашата земја е наменето за цела Европа, земјите на Заливот и САД.

„При тоа е планирано зголемување на работните места за една третина од постоечкиот број вработени, кои, според соопштените информации земаат натпросечна плата во државава и на кои, минатата година, во време на пандемија, им биле зголемени платите за 16 проценти, стои во владиното соопштение.

Не е соопштено кога ќе биде потпишан договорот. 

„Ние сме цврсто фокусирани кон отворањето нови работни места, раст на економијата. Се покажавме како пријателска држава во регионот, којашто генерира политики на пријателство и веруваме дека тоа влијае на интересот за инвестирање овде. Нé радува вашата одлука за новата инвестиција и во Република Северна Македонија и вие гледајте голем пријател и можности за соработка на принципиелно ниво“, рекол премиерот Заев.

На состанокот, директорот Деспотовски презентирал детали за новата инвестиција, како и за разговорите за поддршката од државата за нејзина реализација. Како што беше истакнато, оваа инвестиција е дел од новиот пристап во работењето на Дирекцијата за ТИРЗ со анализа, но и значително покуси рокови за подготовка и склучување договори. Премиерот Заев и претставниците на италијанската компанија се согласија дека ваквиот пристап ќе значи и нов квалитет, поголема сигурност, а со тоа и повеќе странски инвестиции во Република Северна Македонија.