Најмалку седум лица загинале во експлозија на гас во една петкатница во рускиот град Јарослављу, а се стравува дека е поголем бројот на луѓе кои останале заробени под уранатините.

Меѓу настраданите се четири жени, двајца мажи и две деца, веројатно на возраст од 11 и 6 години, изјавила претставничка од Истражниот комитет на Јарославската област Кристина Гузовскаја, пренесе Раша тудеј.

Претставници од руското Министерство за вонредни ситуации за руската агенција Тас наведуваат дека во експлозијата целосно се уништени пет станови, оштетени се десет, а се урнале целосно скалилата од прв до петти кат.

Досега од урнатиот дел на зградата се спасени четири лица, кои претрпеле тешки повреди и се наоѓаат во болница, а меѓу заробените наводно има и деца, изјавил регионалниот гувернер Сергеј Јастребов. Тој додал дека под урнатините би можеле да бидат пронајдени уште тела.

Локалните власти наведуваат дека на местото на несреќата се упатени 55 спасувачи и 130 возила од службите за помош, а е отворена и кривична истрага која треба да покаже дали се почитувале безбедносните прописи.

За оваа несреќа е известен и претседателот на Русија Владимир Путин, вели неговиот портпарол Дмитриј Песков.